REëLS EN REGULASIES VAN DIE ASF

Hingste word genomineer deur hulle eienaar teen ‘n nominale fooi van R1000. 

Met hierdie nominasie gee die hingseienaar toestemming dat een dekking deur die ASF opgeveil mag word.  Die opbrengs sal aan die ASF gaan.

Indien die dekking verkoop word op die hingsveiling word ‘n “kopers opsie” verkry. In kort beteken dit dat die koper ‘n merrie van sy keuse beset kan kry van die betrokke hings en nomineer hy dan die dragtige merrie vir die Speenoud Futurity.

Indien die dekking nie verkoop word nie, het die hingseienaar die reg om teen geen verdere koste, self ‘n dragtige merrie van sy genomineerde hings te nomineer.

Die hingseienaar het egter ook ‘n “skenkers opsie” as sy hingsdekking wel verkoop is. Dit beteken vir ‘n addisionele nominale R1000 kan hy ook ‘n dragtige merrie van die betrokke hings nomineer. Hierdie opsie kan hy ook aan iemand vir ten minste R1000 verkoop as hy nie self ‘n dragtige merrie wil nomineer nie. Die totale opbrengs van hierdie verkope moet egter na die ASF gaan.

Daar sal dus altyd een, maar ‘n maksimum van twee vullens van ‘n genomineerde hings aan die jaarlikse futurity kan deelneem.

Geen hings se dekking sal op die hingsveiling plaasvind indien die nominasie fooi van R1000 en die nominasie vorm teen die sluitingsdatum die ASF bereik het nie. Daar sal GEEN uitsonderings gemaak word nie.

Die koper van die dekking moet direk na afloop van die veiling of binne 24 uur die geld oorbetaal aan die ASF.

Daar word ook  beplan om, as hierdie vullens 3 jaar oud  is, ‘n vertonings futurity te hou. Slegs die vullens wat van die oorsponklike genomineerde merries afkomstig is, sal kwalifiseer. Hulle hoef egter nie in die Speenoud Futurity te geskou het nie. Die eienaar sal, as hulle 2 jaar oud is, hulle in verskillende afdelings kan nomineer - Siertuig, Driegang en Vyfgang. Geen kruisnominasies sal toegelaat word nie en geen veranderings in die afdelings sal toegelaat word as die perd gaan skou as drie jaar oud nie. Daar sal nog oor die nominasie bedrag betaalbaar, besluit word.

Daar sal van 5 beoordelaars gebruik gemaak word wat ‘n “score sheet” sal gebruik vir die beoordeling om te verseker dat dit heeltemal deursigtig is. Daar word ook voorsiening gemaak vir uitdunne en ‘n finaal. Die vullens sal individueel vertoon word en nie die baan gelyk in kom nie. Daar sal op ‘n lukrake wyse besluit word in watter volgorde hulle die baan sal inkom. Dit kan gebeur dat drie uitdunne gehou  word, met 10 vullens in elke uitdun, met die finale 10 of meer dan op die Saterdag van die skou. Geeneen, behalwe die tabuleerder sal egter weet in watter volgorde die finale groep geplaas is nie. Daar sal dus geen front line wees nie. Die finaal is in geheel ‘n nuwe klas.

Indien ‘n hings sou vrek voordat die merrie dragtig verklaar is, sal die koper sy geld, wat hy vir die dekking op die veiling betaal het, terug kry.

Indien die vul dood gebore is of later vrek, word dit as ‘n “act of God” beskou en kan daar ‘n ooreenkoms tusssen die hingseienaar en die merrie-eienaar wees of daar nog ‘n dekking beskikbaar gestel sal word. Die koper van die dekking en die hingseienaar sal ‘n kontrak met mekaar sluit nadat die dekking bekom is waar hierdie gebeurlikhede duidelik omskryf sal word. Die volgende vul sal egter nie kwalifiseer vir die Futurity of toekomstige vertonings Futurities gekoppel aan hierdie betrokke jaar nie.

Bewys van die DNA van die vullens moet voor die skou deur alle deelnemers gelewer word. DNA toetse sal op die eerste 8 plasings uitgevoer word ter bevestiging. Die koste hiervan word deur die ASF gedra.  Dwelmtoetse sal ook lukraak uitgevoer word en sal die koste daarvan weereens deur die ASF gedra word.

Hierdie reëls en regulasies mag van tyd tot tyd aangepas word soos dit nodig blyk te wees en mag dus verander van jaar tot jaar. Die nuuste reëls en regulasies sal egter altyd op die webblad van die ASF (www.africasaddlehorsefuturity.net) beskikbaar wees.

© Ross Millin & ASF